هدني ... صبري السعدي

(هدني)
مو تدري
البدن متعوب
منك يالصرت وياي مثل الضل...
فك مني
حديك سايم
الله اعليك فك مني الحديد او حل...
ثلث ترباع
عمري خلصيته
اوياك ضل ربع الاخير وبعد مايحمل...
ما مره انكسر
كلبك اوانته اتشوف
هاي اسنين دمعة عيني من اتهل ...
هدني اشوهدناني
اوياك ماريد العمر
وياك ما ريدك حبيب وما اريدك خل...
كضيت المضن
من عمري
انه اوياك لوعه وعشرتك تكتل...
بس كافي
صفيت انه
ابحماده اوياك وانته البيها جنك صل...
يالكلك غلط
لا عدل لا انصاف
ماكو انصاف عندك لا عدل تعدل...
هدني انسان
انه وانته موش انسان
وشيوخ الغواني اخيولهم تصهل...
رافكهم ولك
ماريد عشره اوياك
فك مضلوم عندك تك رجل يكزل...
اشتبي من
اليكالب بالمنايا امكالب
ابكل يوم جايب حادلاتك بالعضم تحدل...
هدني اشتبي
مني بس بقه النكاد
مادام النفس بس يصعد اوينزل...
خليني اعيش
الباقي من عمري
خيط العمر بيدك وانته بيه تفتل...
حل خيط العمر
لا تكثر العكدات
نوبه اتشده بيدك نوبه بيه اتفل...
يالصار العمر
بيدك شبيه الصوف
تنفش بيه مره ومره بيه تغزل...
خاف الله
ولك لا تالم المالوم
عليته اشكثر بس كافي بيه اتعل...
كل جسمي
انزرع بجروح
فوك اجروح وين ابياكتر رايد بعد تشتل...
مو عدهم اسمان
اودمهم ايكفيك
وانته استاذ كدها لو ردت تخزل...
شابح عينك
الياحد اعله المالوم
لا يوم اتهجع لايوم بيه اتجل...
وين الشرده
منك خايب الياصوب
وانته ابكل زوايا شو كمت تختل...
ضلمه ايام
عمري خلصتها اوياك
حارمني الكمر ما شوفه من يهل...

» مضايفنه...صبري السعدي
» ابوذيات..صبري السعدي
» حوار مع الشاعر والاعلامي صبري السعدي
» ابوذيه ورشفاه للشاعر صبري السعدي
» ابوذيه لسنها للشاعر صبري السعدي