الشاعر والاعلامي صبري السعدي

الشاعر والاعلامي صبري السعدي

منتدى ادب وفن
 
الرئيسيةالبوابةبحـثمكتبة الصورالأعضاءس .و .جالمجموعاتالتسجيلدخول

شاطر | 
 

 الشاعر ابو معيشي من سيرته وشعره....فرقد الحسيني

اذهب الى الأسفل 
كاتب الموضوعرسالة
صبري السعدي
المدير العام
المدير العام
avatar

عدد المساهمات : 171
تاريخ التسجيل : 13/12/2009

مُساهمةموضوع: الشاعر ابو معيشي من سيرته وشعره....فرقد الحسيني   الأربعاء يونيو 22, 2011 7:08 am




الشاعر
جمعة معيشي داود الشمري
( أبو معيشي )



ألى من تجذر في عقول الناس
وعيا وفي قلوبهم محبة
ألى من اكتحلت المدينة بسماره بعفوية الجنوب
وزين عقدها بفيروزة سوداء
ألى الأنسان الشاعر أبو معيشي
وألى عشاق شعره
أهدي هذا الجهد المتواضع


فرقد الحسيني

وعندما غرق بيته بعد سنتين من حرقه قال وهو يصف وحدته


اصبحت لاسوكن ابزملي ولحدي امحير جني البومه ولحدي
يعل متوسد ابكبري ولحدي اشوه ولايمر شامت عليه


*****

ارسل الشاعر ابو معيشي هذا البيت الشعري الى الشاعر ملا مسعد الناشي


ابدليلي اجروح عيب اتطيب وشاف ولاينكص دمعهه العين وشاف
يخي مسعد تجي للدار وشاف اظلمت ذيج الكبل جانت زهيه

*****

حاول الشاعر ابو معيشي دخول المستشفى العام في سوق الشيوخ لزيارة صديقه الشاعر حمدي الحمدي حيث يرقد هناك فمنع من الدخول00فارتجل هذا البيت الشعري00
عسى دهري المشيبني شباهم امنعوني عن وصل حمدي شباهم
عساهم نار من هبهب شباهم طبيب السوك واصحابه سويه

*****
ارسل ابو معيشي الى الملا صالح الحثيل البيت التالي بمناسبة عودة الشاعر حمدي الحمدي من العلاج000


كريم الله ويعّودعلـــــــي وحشاه امنّزه من حجي الميلات وحشاه
عكب حمدي يصالح علي وحشاه مدينتنه ومجالسنه سويــــه

*****
وحك اللي خلك هبهب ويانه افراكه يشرك بكلبي ويانه
يصالح لوكبل حمدي ويانه سرور الكل صحيب اعلى الوطيه

*****
سرورايصير لحبابه وهالاه ومرحبنه بذجر حمدي وهالاه
وحك الصور اليضوي وهالاه يصالح طاب نوم الليل اليه


*****

يصالح طاب نوم الليل لاياه او تو كلبي سكن يحباب لاياه
وحك البيه اسم يعكوب لاياه مجلسنه زهه من اكبل عليه

*****
فاجابه الشاعر الملا صالح الحثيل000

متى الباري يجمعه ايعود خلاي ابوسط كلبي تره فركاه خلاي
اشمصد المجتمع خلاه خلاي مجانه او وحشته تصعب عليه


*****

وله000مخاطبا الشاعر كاظم النداف

سرك خله بس بيني وبيناك وبالك لخوتك تفضه وبيناك
مصايب دهرك اتهزك وبيناك وتهز كلمن يدوس اعلى الوطيه

*****


وحك السار بيه الكبر بالراي يصاحب مانفع بعداي بالراي
انجان اتريد شركه وياي بالراي تجنبهم كبل حتف المنيــــــه


*****
يدنيه اظلوع كسريلي وراضاي اون لاغنم رايحلي وراضاي
ابيزّه ماقبلت انه وراضـــــــاي لمن حطوا خروف انوب اليه


*****
وحك الماخلك ربي شباهه سبع نيران اله بكلبي شباهه
اعذره المادره بروحي شباهه كتلني المطّلع ويلوم بيـــــــه

*****

زين انته الدمع غدران ويسال ضرب عودي صفار الخيل ويسال
ماتدري زماني اسيوف ويسال علي وانه طريح على الوطيه

*****

دليلي يصبح ويمســـــــي بلاراح صرت مثل الطحن مرمر بلاراح
اصبحت وي الثلاثه امسوا بلا راح صرت لاللسمه ولا للوطيــــــــه


*****

قال الشاعر الحاج سعود السراج00

ماتدري اشجره عليه وسادي فراشي الحزن وهمومي وسادي
بكيت الحم حبل وصلك وسادي تمت وتكطع ابتوته البديــــه

*****
فرد ابو معيشي قائلا00

وحك الصوم والسبعه وساده دفك دمعي وحشر عندي وساده
اغطاي اجبال والمرمر وساده السدر دوشك يحجي اسعود اليه


*****

وله مخاطبا الشاعر حمد الزركان00

العله ياحمد كبرت من الــــوان دمعي كمت اصبنه من الوان
ايام الدهر لضلوعي من الوان تبره الكال ذب حملك عليه


*****

الموت المايخاف انهاه منها الشماته اللي عظيمه عليك منها
الامانه اللي تبره السمه منها بني ادم حملها وشاف اذيه

*****
لاتنشد على كيفي وحالــــي وصل للشيب ياصاحب وحالي
احباب الجانوا ابزولي وحالي غدوا وامسه الوكت وحشه عليه


*****
اصبحت لاسوكن ابزملي ولحدي امحير جني البومه ولحدي
يعل متوسط ابكبري ولحـــــــدي اشوه ولايمر شامت عليه

*****
الدنيه الماعرفت امها وباهــــــــا علي كل يوم نازلي وباها
المصايب خوش اكو حاله وباها اعرفن صاحبي لوعدو ليه


*****

ارسل له الشاعر هاشم فليح الشطري 00يقول

لمن ياعين ليليتي وسلتـــــــي وراح الجان الي منوه وسلتي
غزوني وفرهدوا عنبي وسلتي وذبوا جتلة الناطور بيـــــــــه


*****

اجابه ابو معيشي


ذلولك تاه بالبيده وعنــــــــباك انبكت وعيون عذالك وعنباك
انجان انته خذوا سلتك وعنباك انه المطلوب للناطور ديه


*****

وله ايضا00

منهو الوصل يم داري ولي سال اخبريته ودم دمع عيني ولي سال
انه الي انهبو عنبي ولـــي سال وناطوري انهزم مامر عليــــه

*****

وحك البرواسي اهلك وطعنه زماني ابسهم لضلوعي وطعنه
نصبر لأمر معبودك وطعنه اليزوغ ايفر من ارض الله السعيه

*****

وين اليعتني الداري من الهام ويشوف اسحن صبر دايم من الهام
دقيقه ماخله كلبي من الهام ربع ساعه فرح مامر عليـــــــــه


*****

زماني داف الي حنضل وصابار وطكني ابسهم بالهامه وصابار
من صرت اعتصم بالله وصابار المصايب ضيعن صبري عليه


*****

للشاعر ريسان النايف البيت الشعري التالي


يدنيه آنه عرفت اشبيج مابيج طالج بالثلاثه ابد مابيج
سيف آنه ابغمد مطروح مابيج اذا صار اللزوم انتخو بيه


*****

فرد عليه ابو معيشي

طلكها علي كبلك وملــــــــــها وكنز ماراد من عدها وملها
شكثر زلفات اجن منها وملها وخلت نار بخيمهم سريــــه


*****
سجني لاعلى مطلب وداعي بليل ولا سنه لحالي وداعي
يحكلي لسرف ارداني وداعي بحكي وخل تلوم الناس بيه


*****

ارسل البيت الشعري التالي لصديق له يدعى (عكاب) طالبا منه الذهاب لصديقه الشاعر سعود الراشد


اليوسف شد ذلولك سير عنهه ومن توصل لهم يعكاب عنهه
دار الذل تكله ايشيل عنهه أو يعرض حياته اعلى المنيه


*****

ارسل الشاعر ابو معيشي هذا البيت الشعري للشاعر هلال الحسن00


زماني ابنار من هبهب ويانه ولاواحد وصل حينا ويانه
ردت يهلال كون اتون ويانه انا وسعود من ننصب عزيه


*****

وفي مناسبة اخرى ارسل الشاعر هلال الحسن هذا البيت الشعري يشكو
من تقدم العمر لديه00

مضالي من العمر خمسين عاماي ومثل مجنون طب وطلع عاماي
هاي اتكول بويه وذيج عامــــاي من اسلم بعد مامش ذوق اليه

*****

اجابه الشاعر ابو معيشي000

من زغري الوسن باليل عاديت وهمت يهلال وي الضبي عاديت انجان انته العمر خمسين عاديت ثمن عشرات عمري احساب اليه


*****

ارسل الشاعر عبيد السعيد البيت التالي للشاعر ابو معيشي يشكو من تقدم العمر (الكبر)

تسعر لاهبه ناري ولدواي اسجل لاقلم عندي ولدواي
الكريم ايكول كل داي لهدواي دوه داي الكبر ضايع عليه

*****

اجابه ابو معيشي

عند اللازمه بحساب عدنه وسرور ايصير للطيبين عدنه
الكبر ماله دوه يعبيد عدنه ابد ماشوف اله غير المنيه

*****
قال الشاعر الاستاذ حمدي الحمدي البيت الشعري التالي ردا علي بيت شعري للشاعر عبد الواحد الهلالي000

الدهر من يوم المفارك شملنه جفانه وجنه مايـــــدري شملنه
المصايب شتتن منه شملنه ابعزر بعض وبعض تحت الوطيه

*****
اجابه الشاعر ابو معيشي000

حرت شكتب لكم يحباب شملاي وغدت ماتوصل ليمناي شملاي
معاكم لو رفك بالسير شملاي يحمدي اول شبابي ايعود اليه


*****
يحك لي ويالمها لسكن وهاميت هاساعه نفس عندي وهاميت
ابرزايه البيت ماأنشد وهاميت يحمدي افراكم يصعب عليه


*****
نار الدهر ببيوتي ويالاي اشكثر هم ثابت ابكلبي ويالاي
لاترحل من ابلادك ويالاي الممات احسن مع اصحابك سويه

*****
ارسل الأستاذ الشاعر حسين الهلالي البيت الشعري التالي الى الأستاذ حمدي الحمدي

بسك لاتعذب الروح ياهم انحلت والشوف عندي صار ياهم
وين التستر الخلات ياهم ارحلو وديارهم ظلت خليــــــــه

*****
اجابه ابو معيشي

خل الهم يعذب الروح بالهام ودكن صبر طول الليل بالهام
يحجي انصير شركه وياك بالهام اونون بديارهم كلنه سويه

*****
وله ؛
على احبابي يعيني ادموع هملاي ولاواحد لفاني ابعجل هملاي
يحجي بالدليل ايصير هملاي كثر نبت النبت فوك الوطيه

*****
وعندما شكى الشاعر عبيد السعيد لصديقه ابو معيشي جزعه من الحياة ومن السهر حيث اجبرته الظروف للعمل حارس00 فرد ابو معيشي قائلا

شربنه من الدهر حلوات ومره اسيرن واعتني لعبيد ومره
اليبي يجزع من المعبود ومره يفر من السمه وارض السعيه


*****
وحك الي خلك مهمات تنطار اهدوم الي يحبني علي تنطار
شريف الحطك وسهران تنطار ولاتوكف على المابيه حميه

*****
ارسل له الشاعر عبيد السعيد البيت التالي0000


من مثلي بجثير اهموم عالاي اومن مثلي انهزم والطرد عالاي
ركبت الجبل عود اعتقد عالاي الجلب عضني ونيابه اثرن بيه


*****

اجابه ابو معيشي000


وحك اللي الملك يعبيد يملاك دليلي صار (لك) اهموم يملاك*
انجان الجلب عضك فوك يملاك انه وي الصاف وتعده عليــــــه

*****

* الك/ المليون

لاشك ان الدار لها المكانة الخاصة في قلوب ساكنيها وكثير من الشعراء خاطبوا الدار بعد الابتعاد عنها بلوعة وحزن 0والشاعر ابو معيشي الذي لم يترك مناسبة تمر دون ان يسجل له وقفة معها 0 فهو الاخر يسجل عزاء لنفسه وللدار بعد ان تركها مرغما 0ليتحول سكنه من منطقة (حي العرب)والتي كانت تسمى قديما (البكعاويه) الى منطقة قريبة من محطة القطار والتي يسميها هو (الريل)00 بعد ان هددت البلديه باستخدام( بلدوزر) في حالة امتناع السكان عن الرحيل000يوجه خطابه لصديقه الشاعر ( مله صكبان الازيرجاوي ـ ابو عدنان) والذي يواجه معه نفس الموقف والمصير

يبو عدنان شركه وياي بالهام زماني صارطكه علي بالهام
هم نسكن باراضي (الريل) بالهام هم دوزر يجي اويانه سويه

*****
وله ايضا00

زماني ضيعالي اعيال والدار وعليه اسنين عود الفرح والدار
يبو عدنان يم( الريل) والدار انه وانته وابن (حوكل) سويه

*****

وله ايضا000

وحك اللي خلك هبهب ويانه كل يوم الدهر ناره ويانه
(دوزر) لوتبع داري ويانه اشيلن للرياض بلا تقيه


*****


وله ايضا000مخاطبا الشاعر حمدي الحمدي:

جثيره اجروح دلالي وشاليت صرت مثل الغده طيره وشاليت يحمدي فلشوا بيتي وشاليت بارض صحره وشحيح الماي اليه


*****
بعد ماعود يطربني وياناي اودليلي بنار يحبابي وياناي
ردت الغانمه منهم وياناي خبر ونشيل لارض الله السعيه


*****
ارسل له الشاعر الحاج خلف ساجت البيت الشعري التالي


هدم ساس الأخوه مالبنه جفه وانكر ربانه مالبنه
صدك تشهد يجمعه مالبنه ولاشفته ايتمرضع بين اديه


*****
فأجابه ابو معيشي00

انا منهم لفاني سقم والسال ولاتنشد عليهم بعد والسال
تهمل عيني عليهم دوم والسال ابدمه ومنه شفت يوم المنيه


*****
وحك الفاطمه الزهره وأبنها بيدك ساس للخوه وابنها
العدوك اكشف اسرارك وابنها وخل يعلم ولاتبقى خفيه

*****
في النوادر

جلس ذات يوم ابو معيشي تحت النخلة والتي يفضل الجلوس تحتها دائما في بستان الزاير دولي0وقد حاول اسناد ظهره عليها لكنه ماكان يعلم ببعدها عنه مما ادى الى تدحرجه الى الخلف0فاعتدل ضاحكا00وهوينشد بيتا شعريا يشاطر فيه مثلا شعبيا يقول :
(ايكولون يم عمران صلي 0صلت وفنكحها الهوى)

*****

اشمالك يازماني علي صاليت ابنار وحمسيت اجلاي صاليت
مثل ماصلت أم عمران صاليت فنكحني الهوى وذبني بنويه


*****

بعد ان قضى سهرته في مجلس ال حمدي مع اصدقائه الشعراء0عاد ابو معيشي الى داره في وقت متاخر من الليل0وكان له كلب صغير يحرس داره0 وقد فاجئه ابو معيشي في الدخول الى الدار 0عندها اسرع الكلب ليعضه في ساقه ويمزق ثيابه فارسل الى الشاعر حمدي الحمدي شاكيا ذلك00

الك عني لسان الحال يرواي وهم شفت الندى العطشان يرواي
ماتدري يحمدي اليوم يرواي اكل زري وملخ ثوب العليــــــــــه

*****

في الموت والرثاء

زماني كطع الجبده وراهه بسيف وينظر الشامت وراهه
بعد يحباب يوم الهه وراهه السدر والخام والحدبه سويه

*****

هذا الخطاب الى الشاعر فليح الشطري

وحك من خالج النيران واراك المصايب نحلتلي الحيل واراك
وبعد يوم الحشر وحساب واراك والاعظم سلسله أم سبعين اذيه


*****

اجابه الشاعر فليح الشطري

ابمصايبنا يبو معيشي علينا علاج اوكل كلب شامت علينا
حساب وسنسله ومحشر علينا يهون ابواسطة حامي الحمية


*****

وله في رثاء ولده (معيشي)

بعد ماستنصح الدنيه وليمان جزتني وكمت اطك عسمه وليمان
غريب الشام يرجعلي وليمان غريب البل لحد ماعاد أليه

ويخاطب الشاعر حمدي الحمدي

يحمدي من غدو عني ولافاي هويت ابحر لامردي ولافاي
بياض الشيب من يجبل ولافاي اتيقن وأعرف اطروش المنيه


*****

وله مخاطبا الشاعر عبيد السعيد00

وحك الكل نفس صور بها روح كلمن حملت الحدبه بها روح
ظلام السود هم اهون بها روح بها يعبيد برزخ بيه اذيـــــــــه


*****
وله ايضا000

خوذوا من درس كلبي على يام وتضل اديارنا لازم على يام
اشما طالت سلامتنه على يام على الحدبه انحمل لأرض الوطيه

*****


يرثي الشاعر ابو معيشي صديقه الشاعر الحاج سعود السراج

علي يسعود من يطري ولي عين وحياتك حرمت نومي ولي عين
يحمدي كوم ساعدني ولي عين ابونين اليدهش الحدر الوطيه


*****

وله في وفاة علي ومزهر اولاد فرهود المغشغش بحادث قتل


لعلي ومزهر دموع العين تنصاب ابدمه اوجبدي لهم بسنان تنصاب
فرض واجب بني خيكان تنصاب ماتم من جره بيوم المنيـــــــــــه

*****

وله ايضا في نفس المناسبه

ابد ماتم فكر عندي ولاراي ولا مزنه اشبهت دمعي ولاراي
فديت العين والجبده ولاراي هيجي انه لعلي واجب عليــــــه


*****
متى رب العرش يامر ويقضاي وانه زور وفحم ناري ويقضاي
اخافن لو دنه حتفي ويقضاي جثيـــــر الطك يفل الحيم اليـــه

*****
ارسل هذا البيت الشعري للشاعر الملا صكبان الازيرجاوي بمناسبة وفاة الشاعر حامد البدر00

وحك الكل سنه مسلم طفلهه تشب ناري ولايرهم طفلهه
احن مثل الغده منها طفلهه يمله آنه بفكد حامد اليـــــــه


*****

وله ايضا00وهو يدون تاريخ وفاة الشاعر حامد البدر000

وحك الي ابتله ابهاجر وساره الاجل هدم مدن كثره وساره
ابربيع اول نعش حامد وساره سنة سبعين صار النوح اليه

*****
ارسل ابو معيشي هذين البيتين للشاعر السيد نعمه الجابري بوفاة الشاعر عبيد السعيد00

شري دايف ابدلالــــي ومرباه اتهمل عيني على افراكه ومرباه
ينعمه ماخذوا شوري ومرباه النعش بيكــــــــم يطيبين الحميه

*****
وله ايضا

ينعمه ارسل مراسيلك وليواد اشجخت دنياي بالجبده وليواد
حشم كل بني مالك وليواد لعند اعبيد كلها اتون سويه

*****
فأجابه السيد نعمه الجابري

تكول ارسل يبو معيشي وليواد كضوا ياحيف خلاني وليواد
من احشمهم بني مالك وليواد اشبديهم لو دنه حتف المنيه

*****
رقد الشاعر ابو معيشي في المستشفى قبل وفاته فزاره احد اصدقائه0والذي كان على خلاف معه فانشد ابو معيشي هذا البيت الشعري


وين اهل الهوى عني وشامات بهمي انترست اخروجي وشامات
ابموتي خل يمر عاذل وشامات ويخلي بكل ضلع رمحين اليه

*****

وهذا اخر بيت شعري قاله ابو معيشي وهو على فراش الموت00

صد ليه حكيمي صد عنـــــــي عرف بجروح جبدي صد عني
يروحي اصفي البيابي صد عني احجيلي ابرفجة الجناز بيه

*****


المساجلات

1ـ كأس ليلى
2ـ حريق دار ابو معيشي
3ـ الغراب
4ـ تقيه
5ـ وشراي
6ـ الشيب
7ـ مطره
8ـ البيض
9ـ زليخه



المساجلات


احد الأساليب في كتابة شعر الابوذية هو المساجلات 0اي ياتي شاعر باول بيت شعري فيعقبه شاعر اخر بالمجارات او الجواب في حالة وجود هناك تساؤل في البيت الاول وهكذا تتسع الدائرة لاكثر من شاعر0والمساجلات كثيرة في هذا النوع من الشعر لكونه قصير ويستفز الشعراء0 والمساجلات كثيرة كما حصل بين الشاعر ابو معيشي والشعراء الاخرين من مدينة سوق الشيوخ و مدينة الشطرة والتي يرتبط شعراؤها بعلاقات طيبة مع شعراء مدينة سوق الشيوخ حيث تعقد الجلسات فيما بينهم بين الفترة والاخرى0ومن هذه المساجلات000


مساجلة كأس ليلى

لابد لنا من الايضاح للقارىء الكريم حول هذه المساجلة حيث جاء ذات يوم الشاعر عطشان طلب الحيدري الى فرن ليشتري الخبز ووقعت عيناه على فتاة جميلة كانت واقفة لنفس الغرض0وكان بجانبه صديق يسمى حسن فساله عن اسم تلك الفتاة فاجابه ان اسمها (ليلى) ولكون صديقه ليس بشاعر فقد وجه خطابه الشعري للشاعر ابو معيشي00

دوه علتي ثغر ليلى وشفــــــــها ابره برشفة الوجنه وشفها
حسن ياخوي حيها اكصد وشفها تحب امواصلي كبل المنيــــــه


*****

فاجابه ابو معيشي قائلا00

يحك عطشان كلمن سهر ليله لها وجنه تشع باليل ليلــــــه
حسن يومن شفت بالدار ليله اهي بالحور لو بارض الوطيه


*****

ثم يرد الشاعر عطشان طلب الحيدري شاكيا نفاذ صبره للشاعر ابو معيشي


صبر ماتم يبو معيشي وشمها على الخده ضوه الهندس وشمها
لون بيدي اكض ليلى وشمها فلا جان اسعرت نيران بيــــــــه

*****

فاجابه ابو معيشي متسائلا00

ليله الي اطلعت يسلام مندار ولها منحر تشوف اسهيل مندار
عطشان الثنايا اعتقد مندار ولها وجنه شبه شمس المضيه


*****


فيرد الشاعر عطشان الحيدري بلوعة وحسرة000

لمى ليله يطيب السال منسال ولها حاجب شبيه السيف منسال
لها زلفٍ شرايط ذهب منسال ولها وجنه تضاهي الشمس هيه

*****

ثم ياتي الجواب من ابو معيشي00

تصنّت للحجل عطشان منداي واصيح بصوت محد سمع منداي
لمى ليله يطيب الطاح منداي احسن من طبيب الكون اليــــه

*****
وله ايضا00000

وين اهل الرحم عني وشامه كتلني البل حنج نونه وشامه
يحكلي ارشف وجن ليله وشامه واتوبن من بعد سنتين اليه

*****
وله ايضا00000

مثل بدر الربيع وبزغ ويلاي خد ليله ودليلي بنار ويلاي
يصير اترك بلاد السوك ويلاي اذا ليله الحكم تفرض عليه


*****

هنا ياتي جواب الشاعر عطشان الحيدري طالبا فيه الصبر من ابو معيشي لحين الفصل في هذه القضية لدى حاكم الهوى00

تهتز من ونيني اجبال وتمل وتوج ليله ابدليلي النار وتمل
لاتترك يخي السوك وتمل ولعد قاضي الهوى نرفع شجيه


*****

هنا يتدخل الشاعر الملا صاحب الشيخ جعفر شاكيا ليلى 00وموجها خطابه الى حسن

حسن ليله اعلى كل بدر تراها وتخاف الرمد كل عين تراها
خذت عكلي يهل وادم تراها بعد عكلي شيفيد العيش اليه

*****

ثم يختم الشاعر عطشان الحيدري هذه المساجلة بهذا البيت الشعري 0000


اليلومك تشتعل بالنار ماتاه ولايدري الدليلي الشوك ماتاه
العشك لوماصعب جاقيس ماتاه على ليله ابيادي العامريـــــــه

*****

مساجلةحريق دار ابو معيشي


الشاعر الكبير ابو معيشي كثير النتاج ولا تفوته مناسبة او حدث الا وقال فيه شعرا 0وعندما التهمت النيران بيته المبني من القصب كتب الى الشاعر المرحوم حمدي الحمدي بيتين من شعر الابوذية يشرح فيهما حاله0 وعندما وصلا البيتان احضر الشاعر حمدي الحمدي سيارة كبيرة ودعى الاصدقاء لنصرة ابو معيشي ومساعدته 0وكما هو معروف عن اهالي هذه المدينة فقد امتلأت السيارة بما يحتاجه بيت شب فيه حريق00


قال ابو معشي 000موجها خطابه لصديقه الشاعر حمدي الحمدي000

مر وكتي عكب ماجان حالاي وسيل اللي نزل بالدار حالاي
تعال انته يحمدي وشوف حالاي الجمر والنايبه انطبكن سويه

*****

وقال ايضا0000

هاكلي يصاحب بعد شملاك تشتت وانجسم نصين شملاك
اشبكه عندي اشخله الدهر شملاك ابطرك روحي العزيزه الهاي هيه


*****

اجابه الشاعر الحاج سعود السراج


ياهو للنوايب منعاها النوايب من لفتك منعاها
كلي الدار غيري منعاها هلاهل والبجي والدك سويه


*****
وله ايضا00

جبدتي مادريت انته شفتها علوم اللفت عدوانك شفتها
حين الجيت يم دارك شفتها سوده واللطم واجب عليه


*****

اجابه ابو معيشي00

يوم اكشر يحجي سعود يوماي همت ماعاد اوجد كاع يوماي
هذا يصيح ذاك بهدم يوماي وهلاهل للفزع يلحك عليه


*****

ثم قال متمنيا وجود صديقه الشاعر عجرم بريس الجابري00


ابد مصحي وشوف الطيب ويشاف دمع ماينتكص يسعود ويشاف
لون عجرم يجي للدار ويشوف انه وعبيد صرنه اندك سويه

*****
اجابه الشاعر عجرم الجابري شاكيا له انشغاله0 عنه وقت اللزوم0

اعذرني الوكت والدنيه لهبها ونارك يسعر بكلبي لهبها
الك روحي يبو معيشي لهبها دون المال من يصعب عليه


*****
ابو معيشي 000

اهون لودليلي ابسيف ينصاب ولادمعي يضل للموت ينصاب
احب كلمن عزه يحباب ينصاب علي يهل الوفه كبل المنيــــه


*****

ورغم انشغاله بهذا الحادث الا ان ابو معيشي يستذكر بعض اصدقاءه الشعراء الذين لم يعلموا بهذا الامر حيث يقول000

هيمه اصبحت ديراني وحاماد وشكرت الله على هذا وحاماد
يطارش توصل اليوسف وحاماد اوكلهم نار بدياره سريـــــــه

*****

ثم يوجه عتابه للشاعر المله صالح حثيل لعدم حضوره الى الدار

اعيوني دوم لحبابي ترابان موطكة بشر طكني ترابان كل امحب على داري ترابان بس صالح ابد مابان ليه

*****

تحيه كاتب الحمدي وسالام زماني بسور طوكني وسالام
آنه من اسلم من الرب وسالام المصايب والفرح مكتوب اليه

*****
وهنا يسجل الشاعر ابو معيشي تأريخ ذلك اليوم المشؤوم في حياته بهذا البيت الشعري 00 صفر/1370هجري

كلوب اعداي ماطهرت وسبعان الليالي امسن ضواري ألنه وسبعان
سنة الف وثلثمايه وسبعان ابصفر يوم الدهر شب نار بيه

*****


مساجلة الغراب


بما ان الشعراء يحاولون دائما ايجاد موضوع يحفزهم للكتابة 0ومن خلال مرور الشاعر ابو معيشي وزميله الشاعر عطشان الحيدري بنهر الفرات القريب من مسكنيهما0فقد شاهدا فتاتين قرب النهر وبعد سؤالهما عن اسميهما قالا 00نحن (جاسميه00 وعيده)
هنا قال الشاعر عطشان ماذا تقول ابو معيشي ؟

فقال ابو معيشي

هبت ماني من اولامه وحالـــــه وحال الشوم ابو معيشي وحاله
انه اشما اريد اكض زلفج وحاله مدافع رمت عينج جاســــــميه


*****

رد عليه الشاعر عطشان الحيدري قائلا00

اخجلتني وسهم ملفوظك بياداك هبت وطراد ابو سمحه بياداك
ازركه والزم اجعوده بياداك حلها ولايمك محروك ابيه

*****

قال ابو معيشي00

شلون اشكال وجناته لها الوان وهذا الخلف ابكلبي لها الوان
عن عيده ابي اسالكم لها الوان ابي اخبرهم كبل لاتعم عليه


*****


هنا يحتج الشاعر عطشان الحيدري على ابو معيشي0

علامك كل الك صبرك وجليت وجن حنظل شري بريجك وجليت
حسبتك صكرعالصيده وجليت طلعت اغراب وسفه وخنت بيه


وبما ان هذا ا لبيت الشعري فيه بعض الشىء من القسوة على الشاعرابو معيشي حيث شبهه بالغراب لذا قاطع ابو معيشي صديقه الشاعر عطشان مدة ثلاثة اشهر لكنه مااسرع ان عاد الوئام بينهما000

*****



3 مساجلة ( تقيه)

قال ابو معيشي بيتا شعريا في حق امراة جميلة تدعى (تقيه ) واصفا عذاباته منها0

من اتقيه ذبل عودي وسالاي ويعيني ابجي عبيط احمر وسالاي
ودادج جيف اتركنه وسالاي وهو فرض الصبح واجب عليه

*****
وعندما وصل هذا البيت الشعري الى مسامع الشاعر عجرم الجابري ثارت ثائرته 0مستنكرا تشبيه الشاعر ابو معيشي هوى هذه الفتاة ( بفرض الصبح )
لذلك طلب ابو معيشي من الشاعر عجرم الحضور لديه ليرى بعينيه(تقيه) قائلا له انك اذا رايتها(تهبل) أي تجن 00عندها حضر الشاعر عجرم وسارا سوية في الطريق00وعندما شاهداها بادره بالقول00

*****

بان الثغر ل (تقيه ) شفيته تكلم وانتثر ليلو شفيتــــــــه
توه الكلب ياعجرم شفيته برشف ثغره وعثا كيله البديه

*****
فاجابه عجرم الجابري00
مر دالع عليه اليوم شفتاه يبو معيشي من الياقوت شفتاه
رشف خده ومسك للجعد شفتاه الك لودنتك نفســـك شهيه؟

*****


اجابه ابو معيشي000

خوش ايام الي حلوه فتنّه يعجرم تدري ابحبهن فتنّه
مانبغي شرع يحكم فتنّه الشرع مايحكم الناره سريه


*****

فرد عجرم قائلا00ومتحديا (تقيه) لما اصابه منها0


ابد ماشمن اخدوده وشافـــــي ومنها اعتقد عيب اصحه وشافي
الج مضمومه ي(تقيه) وشافي اعلمج بالجره منج عليــــــــــــه

ثم يطلب من ابو معيشي ان يكتب وصيته اذا كان ولابد من هوى( تقيه)00

صدك ماشمن اخدوده الك شاف عليك ورشف خدينه الك شاف
انجان انته بهوى اتقيه الك شاف يبو معيشي بها تعمل وصيه


*****

فقال ابو معيشي 00

الدمع للموت مابطل ولاشاف يعجرم ركن اعيوني ولاشاف
بعد ماكول مضمومه ولاشاف انه وياك نسجد له سويــــه

*****
ثم يبث ابو معيشي لوعته وأشجانه لصديقه الشاعر خلف ساجت الدجين00

سمعت الحجل ل(تقيه) وداوي خلف كسّرت واهسنه وداوي
اشرب من عرك خده وداوي العلتي ولاطبيب ايمر عليه

*****
هنا يرد الشاعر خلف ساجت الدجين

وين الكه عرك خده ونوشه نصبت الشبج ياجمعه ونوشه
اجاه المايخاف الله ونوشه جفل مرعوب وانه السقم بيه

*****

وعندما سمعت (تقيه) بماقاله ابو معيشي وما سبب لها من احراج وهي التي تكن له الاحترام الشديد اعرضت عنه ولم تلقي عليه التحية كما كانت من قبل عندما تصادفه في الطريق000 وذات يوم صادفها في المدينة اشار لها بعصاه معاتبا ومتحديا0

منهو الوزج عليه وحالـــــج لون من السما نازل وحالج
صدكي ماجزت منج وحالج لما ينطر لحد بالنجف ليه


مساجلة وشراي

جلس ذات يوم الشعراء ابو معيشي والشاعر المله صاحب جعفر والشاعرعطشان الحيدري في دكان لاحد اصدقائهم0وغالبا مايدور الحديث حول الشعرمحاولين ايجاد مبرر لقول الشعروبمصادفة ان مرت فتاتان تاخرت احداهن عن الاخرى فنادتها الاولى 000اسرعي يا(حياة)فردت الاخرى بنعم يا( ناصريه) فاشار لهن الشاعر عطشان الحيدري طالبا منهن التقرب من مجلسهم فلم يمانعن من ذلك وبادر زملاءه بالقول


بريجي الزاد حنضل صار وشراي وبليت اهلي بعظم بلواي وشراي
البصرشنهو يهالي النظر وشراي ابتليت انه بحياة وناصريـــــــه

*****

اجابه الشاعر الملا صاحب جعفر00محذرا له من العواقب الوخيمة0


اترك لاتكض ثعبان من هـــــــــاي ولاتنصاد ياعطشان من هاي
تضل بهواك تنشف هاي من هاي اترك لاتطيح ابهل اذيــــــه

*****

هنا يرد الشاعر عطشان الحيدري 000موجها خطابه للشاعر الملا صاحب000

بشد محنه الهوى ذبنه وهنـّه وخصيم اللي يودنه اصبح وهنّـه
يمله اشلون كلي اترك وهنّـه الكلب وحده والاخرى الروح اليه

*****

لم يستطع صبرا الشاعر ابو معيشي00على نصائح الملا صاحب حتى خاطب الشاعر عطشان قائلا0

اسيوفك لليضد بشط وشرهن وعيش بخير وياهن وشرهن
ثمن للبيض لو حدو وشرهن روحك والتملكه انطيه عطيه

*****

فرد الشاعر عطشان قائلا

روحي والدليل انطي وعاني ثمن وطروش اودي الهن وعاني
اذا قبلن يبو معيشي وعاني النوب اندم وشاة اهل الرديــــــــه
*****

هنا يشير ابو معيشي الى الفتاتين 00قائلا
عسى سل دوم حل بيهن وطاعان اذا ماقبلن بشخصك وطاعان
النوب الزم رمح بيدي وطاعان وسوي يوم مثل الغاضريه

تبسمت الفتاتان وذهبتا بعد ان تركتا الشعراء مع الاحلام00

مساجلة الشيب


الكثير من الناس يشعرون بالضيق عندما يرون الشيب قد غزى شعرهم وبما ان الشعراء هم اكثر الناس تأثراًًًً بذلك00لذا ولدت هذه المساجلة


الشاعر السيد سلمان البطاط

كتلني اللي مرح يمشي وراضاه ابنكل جدمه كسر ضلعي وراضاه
رأيت ابوجنته جنه وراضاه بجثير من الورد يمتاز اليـــــــه


*****

الشاعر ابو معيشي 000

يسيد راح مني الطرب ويشاب وحك جدك لفاني الكبر ويشاب
جبينه ابليل هندس بان ويشاب الكواكب والبدر ضاعن عليـــه


*****

الشاعرعبيد السعيد000

عمل بيه زماني خوش عملاي اسوي خير شر ايصير عملاي
الخطبها عبيد كالت هاذ عملاي شفت بالشيب هاي اتعس قضيه


*****

ابو معيشي000


ابتليت انه ابهواهن درع منشاب دليلي حرك سبع اسلاف منشاب
لون يعبيد صار العيب منشاب نكص اشيوبنه ونلطم سويـــــه


*****
ابو معيشي00

يناري النوب زيديلي وشاباي ابدليلي ومادره العاذل وشاباي
الخطر يسعود من شيبك وشاباي يجفل البيض مامرن عليــــــه

مساجلة مطره

هناك مثل شعبي يقول( صار البيت لمطيره 00وطارت بيه فرد طيره) هذا المثل الشعبي يبدو اتخذه الشعراء مادة للكتابة وهم اللذين يحاولون ان يحاكوا الواقع حيث ان الأمثال دائما لاتأتي من فراغ 0فولدت هذه المساجلة00


ابو معيشي00


عن مطره نهيت الكلب منها ثلث تمنان شفته ايصير منها
مطره ماتكول اشبان منها حسدتوها يهل عالم سويه

*****

ناصر ابراهيم00

شما عندك علي يادهر وطيّر سهامك ماتصل للكلب وطيّر
مطره من تخلي البيت وطيّر ذاك اليوم عيد ايصير اليه


*****
الشاعر الملا صكبان محيسن00

يمطره بالفضل والطيب مطراج بسبب وابل على المخلوك مطراج
عسى ربي يسد ادروب مطراج ويضيعج للابد حدر الوطيـــــــــه


*****

ياسرحسين الشويلي 000

حجيي مايبلل بعد مطره اوصديج المانفع بالضيج مطره
حكها من تشيل البيت مطره مأمنه ولاتشوف الخطر هيــه


******

سيد نعمه الجابري

انه شجم دوب عكلي الهم يباري انكسر ضلعي ولايرهم يباري
عزت قدرتك جلـــــــت يباري جبيرة بيت مطره اتصير هيه


*****

سيد نعمه الجابري أيضًا00


من جور الزمان اغذاي ونصار يحامد ماالي خلان ونصار
تناشدني عليه البيت ونصار عد مطره وتصاوغ بيه هيه

*****

حامد البدر00


ماتنبت خطيطه ابغير مطره الشجر لومه انتهه المشهاب مطره
اشلون اتولت اعلى البيت مطره؟ غير البيت راعيته رديـــــــــــــــه!

*****

مساجلة البيض


قال ابو معيشي مخاطبا صديقه الشاعر السيد هاشم الغريفي


يهاشم من اشوف الشكر تـنحال وحك جدك اعظام اعضاي تـنحال
لون عندي دعاوي البيض تـنحال لأحكم كل شجي الياخذ شجيــــه


******

اجابه السيد هاشم الغريفي00

عيب اعليك شيبك من تحلها اجذبت مااتحل ذوايب من تحلها
لعد دعوى النواهي منتحلها انت من من امير اعلى الوطيه

*****

هذا رد الشاعر ابو معيشي على السيد هاشم الغريفي

سيل اهل الهوى هاشم من الشاب عليهن نار البكلبي من الشاب
انجان البيض جفلتهن من الشاب لكصه بذمتك وآخذ تحيــــــــه

*****

الشاعر الاستاذ حمدي الحمدي000


وهكنه بالموده وابتلينه اولنه الملامـــــــه وبتلينه
ابد مايوم كلنه وابتلينه عهدنه والحيا عدنه سويه


*****

ابو معيشي000

ملوم الكلب يومن صار بيداي على اللي سار والخلخال بيداي
يحمدي كون حكم البيض بيداي لخلي كل شجي ويه شجيـــــه

*****

الشاعر الحاج سعود0000

وحك موسى الكليم الجبل بيداك هواهن بادنه هل حين بيداك
يبو معيشي لون الحكم بيداك فلا تخلي شجي ويه شجيه

ابو معيشي

تون بس ونه لامحزن ولاحاد ولاسبت اليمر تنشد ولاحاد
كل مطرود اله مده ولاحاد وطردهن ضل وراي اسويحليه

*****

ثم يحول خطابه الى الشاعر عجرم الجابري00قائلا0


عميت العين كثر المسح يردان على النزلن ابوادي النهر يردان
يعجرم كون ذني البيض يردان عبــد مملوك وديهن عليــــــــه


*****

ثم يرسل له الشاعر الحاج سعود 00


كل مصباح اسلم الرسم وداي وبعد مايكبلني البيض وداي
انا اشما اريد ادك بالكاع وداي يوافجله حجر ويرد عليـــه


*****

جواب ابو معيشي له00

ياهو المرسلك للبيض وداك اظن هاوي عذاب الروح وداك
ماينبت يحجي سعود وداك معاهن تنغلب وتعم عليـــــــه

تكملة الجزء الاول


فرقد الحسيني
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://wwwsabriy.ahlamontada.net
 
الشاعر ابو معيشي من سيرته وشعره....فرقد الحسيني
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
الشاعر والاعلامي صبري السعدي :: 
القسم العام
 :: منتدى التعارف والمناسبات
-
انتقل الى: